【太公分豬肉】「精簡」祖堂地出售門檻 邊個最開心?

【太公分豬肉】「精簡」祖堂地出售門檻 邊個最開心?

未有發動土改鬥香港地主，地產商已率先成為推動土地改革的急先鋒。近日借「增加土地供應」同「簡化城規程序」嘅名目，由官員—商界—智庫三位一體連番倡議順便爭取埋幾項劇力相當既土改措施，唔單只會加劇香港土地兼併分田地，亦將會根本性改變香港城市土地格局。

早在今年4月，星島日報報導有消息人士指 (又係你呀?) ，有發展商向政府建議賦權予民政專員，「簡化」祖堂地的出售門檻至只須8成宗族成員同意，牽涉新界傳統權益、更或須改動百年《新界條例》大手術，政府已經話成立小組配合研究跟進，又唔見檢討丁屋政策咁積極?

▌「豬頭骨」都變「大肥肉」

放寬祖堂地「強拍」門檻貌似在「促進土地供應」，實際上會令政府在新界收地起公屋的難度提高。像今年6月政府動用《收回土地條例》收回元朗新鴻基地產樓盤YOHO Midtown旁的祖堂地，正是源於新鴻基無法收購餘下祖堂地地段，難以發展私樓，所以先「不反對」政府收回這塊「豬頭骨」起公營房屋，最後態度其實也是不甘不願。

如果降低門檻，相信發展商即刻可以加速兼併有成2,400公頃 (大過明日大嶼兩倍) 既祖堂地業權，尤其在祖堂地附近囤地的發展商相信會更加積極，割據新界土地，本來作為「豬頭骨」的祖堂地即刻變成「大肥肉」。香港4大地產商有上千公頃農地儲備，咁樣幫佢拆牆鬆綁潛在俾佢地囤多2倍有突。

而鄉事派當然想分一杯羹，2018年有鄉事派表明不反對政府以甲級農地價收祖堂地起公屋。但到了今日要「簡化城規程序」，就即刻叫政府放寬出售門檻，善用新界土地，以「合理條件」發展祖堂地。同樣「要錢唔要地」，但土地發展的主導權最後就交到發展商手上，而政府覓地建公屋居屋將更加舉步為艱。

▌「神秘」的祖堂地

一講新界「祖堂地」突然好似變左好多地出黎咁，其實只係一種土地擁地形式，用地上都只不過係新界農地、棕地或者屋地，反而係一直係地產王國難以克服嘅眼中釘。而家政府研究幫地產商起釘，講左咁耐政府連向公眾交個全港祖堂地分佈地圖都冇。

早在2018年政府聯合鄉議局成立新界祖／堂事務工作小組，研究如何加快祖堂地的出售同發展，但到了近日，連建制派在立法會質詢問及祖堂地嘅數量同面積，政府都可以話無相關備存資料。在政府未有官方數字之前，鄉事派連同民政就話要研究點樣加快出售。看來政府都知，祖堂地似乎真係一塊不可告人嘅大肥肉。

明明話要解決房屋問題，一味賴地硬話冇地，但就連最基本的祖堂地的數量分佈及面積都冇，究竟又點樣可以搵地呢？而家搵搵下地，又講到幫埋發展商搵，放寬祖堂地出售門檻，助長發展商囤更多地，遲啲用嚟起貴樓私樓，又加劇左房屋問題。

所以簡化地產商既發展管制根本唔係解決房屋問題既手段，只係向地產商分肥肉同阻礙左解決房屋問題之舉。

8月專研系列 #肢解城市規劃 全集：https://liber-research.com/steamlining_planning/

參考資料：

【星島消息人士：地產商倡祖堂地「鬆綁」 八成宗族成員同意可賣】 https://bit.ly/3jNpbVF

【有問冇答】立法會二十一題：祖堂地 (2020)

https://bit.ly/3yyUBVC

【地產商「投資失敗」都有安慰獎收?】

https://liber-research.com/developer_landresumption/

【港台視點31：阿公地，無得避？】https://fb.watch/7d_leus_59/