土地供應

土地共孽：濕地門口層層疊　林村樓39層高人口Double 繼南豐打頭陣之後，恒基新鴻基今日再入兩個大型「土地共享」申請，分別建議喺大埔汀角路起17層、對著南生圍起25層、林村裡面起39層嘅住宅大廈，位置偏遠，一睇就知呢種由地產商主導既規劃模式出現極大問題。 極高密度唔單只衝擊地區規劃佈局，當中政府要俾動輒億億聲既修橋補路收地成本，為左服務地產商提出既山卡啦位置，拖走埋本身處理房屋土地問題既規劃資源，重有機會順路破除埋同區地產商土儲既發展限制。 如果你睇新鴻基個塊可謂貪婪之最，本身位處濕地緩衝區，發展密度由0.34變4.14，暴增12倍。地產商建議政府開個條路，重會駁到去丁屋大王王光榮(部分)持有既超巨型潛在套丁土儲，亦都好有機會順路緩解埋附近新鴻基剛拎左既1500間「跨代共居」豪宅項目。咁濕地啲雀冇得留底? 新鴻基話個樓契會要求住戶唔好光污染對出南生圍濕地，就做到減低對濕地環境影響，真係好「有效」。 其實恆基個塊都不相伯仲，39層勁過誠哥個洞梓觀世音像，本身揀個塊地係曾經先破壞後發展既經典例子，呢個發展計劃仲會帶來額外多34000人，係現時整個林村谷人口嘅約莫1.5倍，想像下林村條雙線雙程路會發生咩事，即使政府開多兩條大路幫佢駁到入林村既樽頸位，起好後包保日日大塞車，同引發原有選擇鄉村生活既居民移民潮。 究竟呢條屎橋邊個咁叻諗出黎? 翻查翻成個土地共享政策既歷史脈絡，最早追溯到工商界代表黃友嘉既智庫2012年已經提出相類似既建議，及後2017年由林鄭開展「土地大辯論」，預設地產商農地要用「公私合營」模式發展。政府話避免土地共享計劃令人有官商勾結嘅觀感，成立個「土地共享小組」提供第三方意見，竟然委任返黃友嘉做主席，真係好可信噃。 歸根究底，係公私合營呢個遊戲設定，必然導致規劃災難。呢個分地遊戲既最核心精神，說穿了就係透過倍大原有用地上既發展密度，將額外多左既樓面俾7成政府起公屋，地產商自己再在原有地盤以上擸多3成。在此玩法之下，註定左地產商一定會拎啲本身好低密度/豬頭骨既地出黎玩，再將密度無節制擠到最極大，反正都係政府出錢支撐個交通負荷，再圈埋附近既官地入去計大條數，亦都可以幫地產商收埋啲自己收唔到既小地主/民居既地。 [...]

【邊攪郊野公園邊陲　邊讓收棕地計劃潛水】 文章發佈日期: 二零二零年十二月十五日 經常說無地起樓，最新豪宅改劃正向馬鞍山郊野公園發展進擊，但原來同一時間，政府已靜雞雞在另一個地方「抽起」了收回一大塊棕地計劃。 ▍神秘抽起9公頃屏山北棕地 事緣今年9月底，規劃署悄悄在網頁公佈了8塊棕地群的具體收地邊界的文件，翻查可見特別抽起當中一大塊「屏山北」選址的近9公頃棕地（連同相鄰土地合共18公頃），沒有與同期研究的棕地群一併公佈收地邊界，只為這塊棕地留下一句「適時再公布」，意味著這塊如維園般大的收地進度很有可能再被政府拖延。 ▍又係你呀新世界 翻查過往新聞及土地查冊，發現被抽起的「屏山北」選址同區內，包括屏山北選址內6個與新世界相關人士持有的地段，當中大多數為囤積多年，先破壞後發展的棕地。當區亦可以見到新世界曾經有私人豪宅計劃申請，包括橫洲爭議之一嘅39層豪宅申請（Y/YL-PS/2），新世界與合作公司166幢低密度住宅申請（A/YL-PS/565），明顯見到政府對收回地產商潛在棕地土儲似乎格外開恩，對非原居民及郊野公園卻是毫不留情。 ▍收棕地先縮水再潛水 過往這8塊棕地選址自公佈以來一直被官員用作擋箭牌，來應對一切有關政府拖慢發展棕地的質疑。本來的8塊選址，只觸及1000多公頃未善用棕地中的36公頃（3%），已被形容為「大縮水」 [...]