【粉嶺高球場批租竟賤上加賤】

原文發佈於2020年9月

今日香港好彩重有盡責既北區區議員袁浩倫 – 海袁同未被DQ既記者識得追問，先發現原來政府又靜雞雞批多3年俾粉嶺高球場32公頃臨時續租，重要係變左收象徵性$1租短租租金，比起之前既私人遊樂場契約$1000地價加每3%更加賣大包。

人地一個會藉可以賣到成幾千萬，你就話人地係非牟利用途所以只係收象徵性$1租，係「一貫做法」。又話財政緊縮唔夠錢派，另一方便就無敵賤租公有土地財產，咁點解唔立即收番做住過渡性房屋? 半年內起好立即大規模紓緩房屋問題啦。

同埋一開始講話收番塊地用黎做公屋發展，今日最新既講法竟然變左係以「公營房屋作為重點」，即係好有可能收到之後就會有一塊塊拎去賣做豪宅既「其他重點」，政策修辭已經出現微妙變化。

依家政府拖多3年既意思，亦好有可能3年之後又3年，其實林鄭即係話俾大家聽佢已經推左俾下屆特區政府發落，好明顯係玩緊「卸膀操」，唔駛佢任內處理。

一日到黑係度講虛無飄緲既明日大嶼桂山島，明明眼前有塊地就繼續拖字決，林鄭妳重好意思推銷明日大嶼話「我們只欠土地」?