【重榜棕地研究】100公頃「閒置快熟棕地」大發現　本土鄉郊工業重置有救

發佈時間：2022年10月11日　#鄉郊工業 #MilMill #閒置地 #明日大嶼 #郊野公園 #棕地

政府一講幫僅存鄉郊工業覓地重置就話覓地困難，但只要肯認真考察整個新界棕地，根本其實無作業嘅「閒置棕地」一地都係，無地重置純粹藉口。

為全面揭示呢個有地冇人用，有人冇地用嘅問題，我地聯同綠色和平精心炮製左一份名為《快熟棕地》既研究報告，逐寸地咁數哂近發展區閒置棕地，發現呢類「閒置棕」竟然多達100公頃，夠哂安置全港所有類似冰粒廠、𠝹木廠、醬油廠、食品加工廠等只佔全港23公頃既鄉郊工業搬完再搬4次都有突，再一次證明係棕地重置交白卷令鄉郊工業迫上絕路。

為防政府「揀擇」藉詞棕地山旯旮，必須強調呢批100公頃閒置棕地係「快熟」同即食，全部經過以下條件精心挑選：

方便：位於現有發展區邊界一公里/十分鐘車程內
好用：每塊面積至少2公頃
即食：未有已知發展計劃

又大又近又相對已平整，估計慳返平整時間1-2年，咁「快熟」當前，你叫收到塊長洲荒地選址嘅Mil Mill回收廠情何以堪?

▍立即睇《快熟棕地：北部都會區具發展潛⼒的棕地研究》
▍一圖睇清「快熟棕地」及「閒置快熟棕地」分佈

但報告份量當然不只能對應鄉郊工業重置議題，同樣重要係「快熟」處理房屋問題，當中433公頃「快熟棕地」，保守估計已夠上10萬伙中低密度公屋居屋，又話提速提量，只顧開發郊野山區同明日大嶼其實係咪務虛?

研究報告內精選5個「快熟棕地餐」，加送3個「閒置快熟棕地」焦點個案，圖文並茂分析其發展史及獨特區位因素，直擊政府現行嘆慢板嘅收回棕地政策，例如：

▍閒置14年「陽春」棕地 – 長春新村
▏鄰近閒置快熟棕地面積：21公頃
Park YOHO以南嘅5公頃棕地，空置長達14年，期間有住宅申請，但至今仍未有任何發展。

從2008年（左圖）及2013年（右圖）的地政署航拍圖可⾒，⻑春新村⼀幅超過5公頃的棕地，多年⼀直空置。

▍「踩界」棕地– 元朗南山下村白沙村
▏鄰近閒置快熟棕地面積：12公頃
緊貼元朗南新發展區的界線，只要將界線延伸即可一併處理，容易操作。

元朗南新發展區外有近12公頃的閒置快熟棕地。

▍啱曬政府口味 – 洪水橋
▏快熟棕地面積：108公頃，當中19公頃閒置
流浮山50公頃棕地、同埋規劃署自己列為「高發展潛力」嘅大道村路17公頃棕地群，啱曬政府口味。

⼤道村路棕地群（16公頃快熟棕地）

沙江圍及沙江村（50公頃快熟棕地）

今次報告唔單只獲全港大大小小報章媒體，發展局都立即迫著晚上回應話「部分」棕地已包含在未來發展，即係間接承認左現時各種房屋同重置問題，都係「部分」源於冇全面收回呢大批快熟棕地作發展同重置所導致。

與其不停帶風向講開發郊野公園及明日大嶼動輒花20-30年時間嘅昂貴開發，「快熟棕地」不二之選已經擺在眼前，如果有得揀你估市民真係會支持你倒錢落海?