文章發佈日期：2021年7月16日

被御為係林鄭房屋新政既「過渡性房屋」政策，本來係民間一個「快靚正」既解決房屋問題選項，到近年政府搵左唔少夾地產商拎私人地俾社福機構做，之前已經俾民間批評過變左幫地產商平整定塊生地既「過橋屋」。

成份文件一大「亮點」，可以睇到政府「優化」左最新過渡性房屋既補貼政策，變左起一間貨櫃屋政府會補貼最多55萬，對於一間只用幾年貨仔既貨櫃屋，成本可以講得上係天價。

對比番55萬補貼一個臨時房屋單位，2021年起一間用到幾十年既公屋單位最新建築成本，都只不過係61萬一間。如果塊私人地最後由政府收番繼續做過渡屋就冇可厚非，但如果係拎出黎幾年就俾地產商收番起豪宅，根本係極度浪費公帑既補貼做法，點解政府唔直接收番塊地黎起公屋?

當然條數唔知伙拍團體之間點claim補貼，但單睇恆地兩塊棕地土儲伙拍「新界社團聯會」起成2,000幾個過渡性房屋，咁已經可以拎成11億政府補貼。而地產商出黎「免費」平整土地等起豪宅既成本，又會唔會可以暗中計左入去每個單位個55萬補貼裡面? 立會文件基本上冇詳細交代，立依家法會亦唔知重有冇足夠智慧去追問呢個問題。

今次計劃亦狠狠打破左政府一路以黎既棕地謊言。在選址方面，完全印證左其實就算幾偏遠既棕地都好，都可以拎到出黎做「資助房屋」，例如位處粉錦公路旁，介乎於林村同橫台山之間既「打石湖村」，一直都係棕土集中營。政府成日話因為位置偏遠唔適合收黎做鄉村式公屋，但係新世界用黎做居民組群一樣既過渡性房屋，起510間4層近千人住，一下變得就得，點解唔慳番成2億補貼直接收左佢起鄉村式公屋?