疫情及經濟逆轉下，眾多部門要「勒緊褲頭」，但有一項開支一枝獨秀，就係「長期優良服務公費旅行獎勵計劃」，即係獎勵資深公務員去旅行嘅開支【註1】：2021－22年預算達$2.46億，係2020－21年嘅實際開支$3,377萬嘅7.3倍，亦比同年嘅核准預算增加85%【註2】。

政府解釋舊年因為疫情，多達3,430位幸運兒要逼埋今年去旅行。疫情下，飛唔飛到都成為問題，但呢筆開支仍然係2019－20年實際開支（疫情前）嘅兩倍左右，令人百思不得其解。

「公費旅行計劃經濟圈」早已出現，不少旅行社均有「公費旅行獎勵計劃」package，由歐洲巴爾幹半島、非洲撒哈拉沙漠去到風光明媚嘅新西蘭都有，可謂應有盡有【註3】，係來年全球疫情仍然嚴峻下推行「旅遊氣泡」，邊個會最開心？

除此之外，唔係資深嘅公務員都有「度假旅費」津貼：高級公務員例如首長級薪級表第7點或以上嘅公務員，可以一年最多攞$79,050公帑去旅行【註4】，相關開支係2021－22年亦達到$1.45億【註2】。

雖然獎勵資深員工去旅行係好多大公司嘅普遍做法，但面對財困，政府竟然唔理公眾觀感，繼續「自己獎自己」：每個受惠嘅幸運兒，閒閒地都受資助幾萬蚊【註5】、合資格嘅高級公務員每年亦可以攞$8萬公帑去旅行，同樣係8萬蚊，失業市民請求政府支援貸款，竟然要比利息，做埋財仔個份。一邊對市民度縮，一邊對自己人大開水喉，說好的財政紀律去左邊呢？

【註1】長期優良服務公費旅行獎勵計劃「旨在獎勵長期服務而表現持續優良的員工，向獲選 的本地非首長級公務員及其同行人士發放旅行津貼 。」，以往只容許員工同行配偶獲資助，林鄭月娥喺2018年施政報告放寬限制，連員工一名同行親友或長期伴侶都可以獲資助，2017年獲獎人數達2510位

公務員事務局 長期優良服務公費旅行獎勵計劃 https://www.csb.gov.hk/tc_chi/admin/relations/168.html

立法會 公務員及資助機構員工事務委員會2018年11月19日舉行的會議有關公務員嘉獎計劃的最新背景資料簡介

【註2】2021至22年度財政年度政府財政預算案 總目46－公務員一般開支 https://www.budget.gov.hk/2021/chi/pdf/chead046.pdf

【註3】金怡假期 公務員【長期優良服務公費旅行獎勵計劃】旅行團

JeTour 長期優良服務公費旅行獎勵計劃 http://bit.ly/3pOPQCq

【註4】公務員事務局 度假旅費 https://www.csb.gov.hk/tc_chi/admin/benefits/113.html

【註5】2019年4月3日 TOPick 政府擲1.31億元獎勵2500公務員去旅行　包食住人均資助5.2萬 http://bit.ly/37Ihquy

▍研究到底　參與小額月捐支持