文章發佈日期: 二零二一年四月五日

復活節長假，本研研究員外出郊野公園考察，驚見喺荔枝窩村屹立一座新設巨型LED mon，近睇嘅話，唔講以為自己去咗麥當勞點餐，就算遠睇，黃昏天色陰暗時亦會閃到頭暈暈。

個LED mon位於荔枝窩協天宮同小瀛學校旁邊、古榕樹對面，同旁邊鄉村環境絕對不匹配。雖然烈日當空時絕對睇唔到發光嘅螢光幕，但刺眼光線係夜晚猶如漆黑中嘅螢火蟲，非常出眾；可惜螢幕展示嘅，只係手機都睇到嘅天氣資料，所以呢個LED mon嘅實際功用，接近係零，冇郊遊人士駐足觀看，佢嘅存在只係會帶來光害。而且室內電子儀器放喺室外日曬雨淋，保養成本一定高。

呢個LED mon嘅出現，連同係船灣郊野公園各處湧現大煞風景嘅巨型展示牌，顯示諗得出將呢件室內設施擺係室外嘅官員，明顯唔係從享受同欣賞郊野嘅行山客角度諗嘢，而係諗緊引入大量遊客去鄉郊深處，將市區mass tourism概念套入郊野，顛覆郊野公園設立原意，整個規劃極可能為郊野帶來浩劫。早前政府計劃撥款5.5億「優化」郊野公園係唔係就係呢啲令人啼笑皆非嘅「多舊魚」設施？