近日特首好想用盡各種辦法陸路「通關」，不過得唔到中央積極回覆，但其實深圳一方已經率先喺疫情「嚴峻」之時刺破香港海域界線。近日有一則唔顯眼嘅新聞，大陸公司「招商蛇口船」創立咗條「環香港大嶼山航線」，長驅直入香港海上遊足10個景點，第一團已經喺11月14日首航。雖然有少量本地媒體低調報導，但都只係清一色正面評價，未曾探討當中潛在問題。

呢條「環香港大嶼山航線」全程56.4海里，成個旅程會圍繞大嶼山一圈，又睇香港機場、經青馬大橋、維多利亞港、長洲、天壇大佛(@_@)、港珠澳大橋，「東西人工島」，重講明會去白海豚自然保護區（！？），話「打造集旅遊地產、母港經濟、郵輪產業」嘅「高端郵輪旅游生態圈」云云。

「旅遊地產」先唔講，單睇去「白海豚自然保護區」睇海豚，究竟係咪會走入海岸保護區? 根據香港《海岸公園及海岸保護區規例》，駛入船隻速度唔可以超過10節，否則有高速船經過，海豚就會停止覓食，太過頻繁會攪到佢地冇啖好食，但呢隻「大灣區二號」航速係14節，就算唔違法駛入海岸公園，成隻350人豪華遊輪走去追豚睇都同趕盡殺絕冇分別。

另外，深圳船喺香港彈出彈入，究竟有冇出入境等執法問題? 大灣區一號標榜呢條係「國內首個只需身份證，便可登船環繞大嶼山海上觀光的航線」，意味住完全唔駛做香港出入境手續，開船P又駛唔駛跟599G?

過往幾年其實暗中已經有一啲「旅遊地產」項目浮現過，例如被評為「富豪遊艇樂園」嘅雅居樂南丫島博寮港計劃，都係想發展遊艇+渡假+地產一站式嘅開發，若果加埋自出自入嘅深港航線就一理通百理明。但唔係所有叫自己「大灣區」都係做梗對大灣區好嘅事，究竟會唔會違反咗國家「房屋只住不炒」嘅總體方針?

大灣區自出自入航線開通平日肯定大張羅鼓，但港府一方一反常態唔邀功，反而出奇低調，係咪都預視到將會導致香港海洋空間過度旅遊化，聲稱大嶼山北發展「南保育」都會成為一個笑話？！

▋參考資料：

深圳船公司大嶼山環島遊今首航 內地居民只須身分證即可上船:

【南山蛇口·门票】湾区海上游新航线来了！

—

【還欠30%】研續路難　急需你的訂閱支持

Liber Podcast：https://anchor.fm/liberresearch

義工招募：https://bit.ly/2SbbyT3