旅遊

財政預算案預留5億係郊野公園增設樹頂歷奇同搞豪華露營 (glamping)等，另撥5500萬比旅遊事務署升級 十條熱門行山徑。消息一出，「行山界」劣評如潮，擔心政府又搞亂檔。 呢5億5千萬撥款，唔單止「搞亂檔」咁簡單，仲意味政府或已調整「搞郊野公園」嘅方法－由明刀明槍開發邊陲地帶，轉為低調「私有化」及「旅遊化」郊野公園，先淘空同破壞郊野公園本身嘅根基，再打開開發郊野公園嘅潘多拉盒子。 「私有化」、「豪華化」 破壞郊野公園公共性 雖然政府無提供進一步資料，但合理推斷豪華營地及樹頂歷奇屬商業營運收費設施，本質上與樸實及免費設施格格不入。郊野公園40多年歷史中未曾出現過類似豪華設施，若成事將顛覆郊野公園嘅公共性，將其變成一件可被私人開發嘅資源，後患無窮。 《郊野公園條例》通過時，麥理浩曾經講過：「沙灘同山丘（指郊野公園）屬於大眾，遊艇、哥爾夫球場呢啲豪華設施，係小眾玩意。」(...the beaches and [...]