【好有火🔥】2020年山火面積急升 真係意外咁簡單？
文章發佈日期 : 2021 年 2 月 17 日 有無覺得舊年重陽山火好似特別勁？呢個唔係幻覺！前幾日明報頭條引述政府最新數字指，2020年受山火波及嘅郊野公園面積達900公頃，較前年高出3倍，即等同47個維園咁大【註一】。翻查過往報導中漁護署所供資料顯示，過去4年郊野公園內受山火波及嘅累計面積都只係866.9公頃【註二】，加埋都唔夠2020一年嘅900公頃，一年翻倍的「燒山」增長異常。 而自然因素似乎並非主因。山火嘅自然因素複雜，可以是高溫、低相對濕度、缺少雨水等等。若以雨量而言，2020年並非特別乾旱，天文台資料顯示，2020年總雨量（2,395毫米）與過去7年平均值（2,438毫米）相若，而重陽大火發生嘅10月，雨量亦有142毫米，環境因素不極端【註三】，所以2020年大規模山火背景因素並非特別風高物燥，而係外在嘅人為因素。 [...]
